ธิรตฺถุ ตํ ยสลาภํ, ธนลาภญฺจ พฺราหฺมณ;
ยา วุตฺติ วินิปาเตน, อธมฺมจรเณน วาติฯ
ฉวกชาตกํ นวมํฯ
310. เสยฺยชาตกํ (4-1-10)
[37]
สสมุทฺทปริยายํ , มหิํ สาครกุณฺฑลํ;
น อิจฺเฉ สห นินฺทาย, เอวํ เสยฺย [สยฺห (สี. สฺยา. ปี.)] วิชานหิฯ
[38]
ธิรตฺถุ ตํ ยสลาภํ, ธนลาภญฺจ พฺราหฺมณ;
ยา วุตฺติ วินิปาเตน, อธมฺมจรเณน วาฯ
[39]
อปิ เจ ปตฺตมาทาย, อนคาโร ปริพฺพเช;
สาเยว ชีวิกา เสยฺโย, ยา จาธมฺเมน เอสนาฯ
[40]
อปิ เจ ปตฺตมาทาย, อนคาโร ปริพฺพเช;
อญฺญํ อหิํสยํ โลเก, อปิ รชฺเชน ตํ วรนฺติฯ
เสยฺยชาตกํ [สยฺหชาตกํ (สี. สฺยา. ปี.)] ทสมํฯ
กาลิงฺควคฺโค [วิวรวคฺโค (สี. ปี.)] ปฐโมฯ
ตสฺสุทฺทานํ –
วิวรญฺจ อเทยฺย สมิทฺธวรํ, อถ ททฺทร ปาปมหาติรโห;
อถ โกลิ ปลาสวรญฺจ กร, จริมํ สสมุทฺทวเรน ทสาติฯ
2. ปุจิมนฺทวคฺโค
311. ปุจิมนฺทชาตกํ (4-2-1)
[41]
อุฏฺเฐหิ โจร กิํ เสสิ, โก อตฺโถ สุปเนน [สุปิเตน (สี.), สุปิเนน (ปี. ก.)] เต;
มา ตํ คเหสุํ [คณฺเหยฺยุํ (ก.)] ราชาโน, คาเม กิพฺพิสการกํฯ
[42]
ยํ นุ [นูน (สฺยา.)] โจรํ คเหสฺสนฺติ, คาเม กิพฺพิสการกํ;
กิํ ตตฺถ ปุจิมนฺทสฺส, วเน ชาตสฺส ติฏฺฐโตฯ
[43]
น ตฺวํ อสฺสตฺถ ชานาสิ, มม โจรสฺส จนฺตรํ;
โจรํ คเหตฺวา ราชาโน, คาเม กิพฺพิสการกํ;
อปฺเปนฺติ [อจฺเจนฺติ (สฺยา.)] นิมฺพสูลสฺมิํ, ตสฺมิํ เม สงฺกเต มโนฯ
[44]
สงฺเกยฺย สงฺกิตพฺพานิ, รกฺเขยฺยานาคตํ ภยํ;
อนาคตภยา ธีโร, อุโภ โลเก อเวกฺขตีติฯ
ปุจิมนฺทชาตกํ ปฐมํฯ
312. กสฺสปมนฺทิยชาตกํ (4-2-2)
[45]
อปิ กสฺสป มนฺทิยา, ยุวา สปติ หนฺติ [สมฺปฏิหนฺติ (ก.)] วา;
สพฺพํ ตํ ขมเต ธีโร, ปณฺฑิโต ตํ ติติกฺขติฯ
[46]
สเจปิ สนฺโต วิวทนฺติ, ขิปฺปํ สนฺธียเร ปุน;
พาลา ปตฺตาว ภิชฺชนฺติ, น เต สมถมชฺฌคูฯ
[47]
เอเต ภิยฺโย สมายนฺติ, สนฺธิ เตสํ น ชีรติ;
โย จาธิปนฺนํ ชานาติ, โย จ ชานาติ เทสนํฯ
[48]
เอโส หิ อุตฺตริตโร, ภารวโห ธุรทฺธโร;
โย ปเรสาธิปนฺนานํ , สยํ สนฺธาตุมรหตีติฯ
กสฺสปมนฺทิยชาตกํ ทุติยํฯ
313. ขนฺตีวาทีชาตกํ (4-2-3)
[49]
โย เต หตฺเถ จ ปาเท จ, กณฺณนาสญฺจ เฉทยิ;
ตสฺส กุชฺฌ มหาวีร, มา รฏฺฐํ วินสา [วินสฺส (ก. สี. สฺยา. ก.)] อิทํฯ
[50]
โย เม หตฺเถ จ ปาเท จ, กณฺณนาสญฺจ เฉทยิ;
จิรํ ชีวตุ โส ราชา, น หิ กุชฺฌนฺติ มาทิสาฯ
[51]
อหู อตีตมทฺธานํ [อหุ อตีตมทฺธาเน (สฺยา. ปี. ก.)], สมโณ ขนฺติทีปโน;
ตํ ขนฺติยาเยว ฐิตํ, กาสิราชา อเฉทยิฯ
[52]
ตสฺส กมฺม [กมฺมสฺส (สี. ปี.)] ผรุสสฺส, วิปาโก กฏุโก อหุ;
ยํ กาสิราชา เวเทสิ, นิรยมฺหิ สมปฺปิโตติฯ
ขนฺตีวาทีชาตกํ ตติยํฯ
314. โลหกุมฺภิชาตกํ (4-2-4)
[53]
ทุชฺชีวิตมชีวิมฺห, เย สนฺเต [เยสํ โน (สฺยา. ก.)] น ททมฺหเส;
วิชฺชมาเนสุ โภเคสุ, ทีปํ นากมฺห อตฺตโนฯ
[54]
สฏฺฐิ [สฏฺฐิํ (สฺยา.)] วสฺสสหสฺสานิ, ปริปุณฺณานิ สพฺพโส;
นิรเย ปจฺจมานานํ, กทา อนฺโต ภวิสฺสติฯ
[55]
นตฺถิ อนฺโต กุโต อนฺโต, น อนฺโต ปฏิทิสฺสติ;
ตทา หิ ปกตํ ปาปํ, มม ตุยฺหญฺจ มาริสา [มาริส (สี. สฺยา. ปี.)]ฯ
[56]
โสหํ นูน อิโต คนฺตฺวา, โยนิํ ลทฺธาน มานุสิํ;
วทญฺญู สีลสมฺปนฺโน, กาหามิ กุสลํ พหุนฺติฯ
โลหกุมฺภิชาตกํ จตุตฺถํฯ
315. สพฺพมํสลาภชาตกํ (4-2-5)
[57]
ผรุสา วต เต วาจา, มํสํ [สมฺม (ปี. ก.)] ยาจนโก อสิ [จสิ (ปี.)];
กิโลมสทิสี [กิโลมสฺส สทิสา (ปี.)] วาจา, กิโลมํ สมฺม ทมฺมิ เตฯ
[58]
องฺคเมตํ มนุสฺสานํ, ภาตา โลเก ปวุจฺจติ;
องฺคสฺส สทิสี วาจา [องฺคสฺสทิสี เต วาจา (ก.)], องฺคํ สมฺม ททามิ เตฯ
[59]
ตาตาติ ปุตฺโต วทมาโน, กมฺเปติ [สมฺเมติ (ก.)] หทยํ ปิตุ;
หทยสฺส สทิสี [หทยสฺสทิสี (ก.)] วาจา, หทยํ สมฺม ทมฺมิ เตฯ
[60]
ยสฺส คาเม สขา นตฺถิ, ยถารญฺญํ ตเถว ตํ;
สพฺพสฺส สทิสี วาจา, สพฺพํ สมฺม ททามิ เตติฯ
สพฺพมํสลาภชาตกํ [มํสชาตกํ (สี. สฺยา. ปี.)] ปญฺจมํฯ
316. สสปณฺฑิตชาตกํ (4-2-6)
[61]
สตฺต เม โรหิตา มจฺฉา, อุทกา ถลมุพฺภตา;
อิทํ พฺราหฺมณ เม อตฺถิ, เอตํ ภุตฺวา วเน วสฯ
[62]
ทุสฺส เม เขตฺตปาลสฺส, รตฺติภตฺตํ อปาภตํ;
มํสสูลา จ ทฺเว โคธา, เอกญฺจ ทธิวารกํ;
อิทํ พฺราหฺมณ เม อตฺถิ, เอตํ ภุตฺวา วเน วสฯ
[63]
อมฺพปกฺกํ ทกํ [อมฺพปกฺโกทกํ (สี. ปี.)] สีตํ, สีตจฺฉายา มโนรมา [สีตจฺฉายํ มโนรมํ (สี. สฺยา. ปี.)];
อิทํ พฺราหฺมณ เม อตฺถิ, เอตํ ภุตฺวา วเน วสฯ
[64]
น สสสฺส ติลา อตฺถิ, น มุคฺคา นปิ ตณฺฑุลา;
อิมินา อคฺคินา ปกฺกํ, มมํ [มํสํ (ก.)] ภุตฺวา วเน วสาติฯ
สสปณฺฑิตชาตกํ ฉฏฺฐํฯ
317. มตโรทนชาตกํ (4-2-7)
[65]
มตํ มตํ เอว [มตมตเมว (สี. สฺยา. ปี.)] โรทถ, น หิ ตํ โรทถ โย มริสฺสติ;
สพฺเพปิ [สพฺเพว (สี. สฺยา. ปี.)] สรีรธาริโน, อนุปุพฺเพน ชหนฺติ ชีวิตํฯ
[66]
เทวมนุสฺสา จตุปฺปทา, ปกฺขิคณา อุรคา จ โภคิโน;
สมฺหิ [ยมฺหิ (สฺยา.), อสฺมิํ (ปี. ก.)] สรีเร อนิสฺสรา, รมมานาว ชหนฺติ ชีวิตํฯ
[67]
เอวํ จลิตํ อสณฺฐิตํ, สุขทุกฺขํ มนุเชสฺวเปกฺขิย;
กนฺทิตรุทิตํ นิรตฺถกํ, กิํ โว โสกคณาภิกีรเรฯ
[68]
ธุตฺตา จ โสณฺฑา [ธุตฺตา โสณฺฑา (สี.), ธุตฺตา โสณฺฑา จ (สฺยา.)] อกตา, พาลา สูรา อโยคิโน [พาลา สูรา วีรา อโยคิโน (ปี.)];
ธีรํ มญฺญนฺติ พาโลติ, เย ธมฺมสฺส อโกวิทาติฯ
มตโรทนชาตกํ สตฺตมํฯ
318. กณเวรชาตกํ (4-2-8)
[69]
ยํ ตํ วสนฺตสมเย, กณเวเรสุ ภาณุสุ;
สามํ พาหาย ปีเฬสิ, สา ตํ อาโรคฺยมพฺรวิฯ
[70]
อมฺโภ น กิร สทฺเธยฺยํ, ยํ วาโต ปพฺพตํ วเห;
ปพฺพตญฺเจ วเห วาโต, สพฺพมฺปิ ปถวิํ วเห;
ยตฺถ สามา กาลกตา [กาลงฺกตา (ก.)], สา มํ อาโรคฺยมพฺรวิฯ
[71]
น เจว สา กาลกตา, น จ สา อญฺญมิจฺฉติ;
เอกภตฺติกินี [เอกภตฺตา กิร (สี. สฺยา.), เอกภตฺตกินี (ปี.)] สามา, ตเมว อภิกงฺขติฯ
[72]
อสนฺถุตํ มํ จิรสนฺถุเตน [อสนฺธตํ มํ จิรสนฺธเตน (ก.)], นิมีนิ สามา อธุวํ ธุเวน;
มยาปิ สามา นิมิเนยฺย อญฺญํ, อิโต อหํ ทูรตรํ คมิสฺสนฺติฯ
กณเวรชาตกํ อฏฺฐมํฯ
319. ติตฺติรชาตกํ (4-2-9)
[73]
สุสุขํ วต ชีวามิ, ลภามิ เจว ภุญฺชิตุํ;
ปริปนฺเถว ติฏฺฐามิ, กา นุ ภนฺเต คตี มมฯ
[74]
มโน เจ เต นปฺปณมติ, ปกฺขิ ปาปสฺส กมฺมุโน;
อพฺยาวฏสฺส ภทฺรสฺส, น ปาปมุปลิมฺปติฯ
[75]
ญาตโก โน นิสินฺโนติ, พหุ อาคจฺฉเต ชโน;
ปฏิจฺจ กมฺมํ ผุสติ, ตสฺมิํ เม สงฺกเต มโนฯ
[76]
น ปฏิจฺจ กมฺมํ ผุสติ, มโน เจ นปฺปทุสฺสติ;
อปฺโปสฺสุกฺกสฺส ภทฺรสฺส, น ปาปมุปลิมฺปตีติฯ
ติตฺติรชาตกํ นวมํฯ
320. สุจฺจชชาตกํ (4-2-10)
[77]
สุจฺจชํ วต นจฺจชิ, วาจาย อททํ คิริํ;
กิํ หิตสฺส จชนฺตสฺส, วาจาย อทท ปพฺพตํฯ
[78]
ยญฺหิ กยิรา ตญฺหิ วเท, ยํ น กยิรา น ตํ วเท;
อกโรนฺตํ ภาสมานํ, ปริชานนฺติ ปณฺฑิตาฯ
[79]
ราชปุตฺต นโม ตฺยตฺถุ, สจฺเจ ธมฺเม ฐิโต จสิ;
ยสฺส เต พฺยสนํ ปตฺโต, สจฺจสฺมิํ รมเต มโนฯ
[80]
ยา ทลิทฺที ทลิทฺทสฺส, อฑฺฒา อฑฺฒสฺส กิตฺติม [กิตฺติมา (สี. สฺยา. ปี.)];
สา หิสฺส ปรมา ภริยา, สหิรญฺญสฺส อิตฺถิโยติฯ
สุจฺจชชาตกํ ทสมํฯ
ปุจิมนฺทวคฺโค ทุติโยฯ
ตสฺสุทฺทานํ –
อถ โจร สกสฺสป ขนฺตีวโร, ทุชฺชีวิตตา จ วรา ผรุสา;
อถ สส มตญฺจ วสนฺต สุขํ, สุจฺจชํวตนจฺจชินา จ ทสาติฯ
3. กุฏิทูสกวคฺโค
321. กุฏิทูสกชาตกํ (4-3-1)
[81]
มนุสฺสสฺเสว เต สีสํ, หตฺถปาทา จ วานร;
อถ เกน นุ วณฺเณน, อคารํ เต น วิชฺชติฯ
[82]
มนุสฺสสฺเสว เม สีสํ, หตฺถปาทา จ สิงฺคิล [สิงฺคาล (ก.), ปิงฺคล (ฏีกา)];
ยาหุ เสฏฺฐา มนุสฺเสสุ, สา เม ปญฺญา น วิชฺชติฯ
[83]